祝閣位新年快樂🎊✨
新一年我又喺時候寫下文章😆
每次上堂，無論喺社區班定喺教練認證，都會有學生問我有趣嘅問題，今次嘅問題喺關節出現「咯咯」聲，究竟有冇問題呢？
有冇試過「啪」手指？或者得閒轉吓腰扭吓頸就會有啲好爽皮又清脆嘅關節「咯、咯」聲出現？得閒轉下個膊頭又會「咯、咯」，做幾下掌上壓、操幾下引體上升又「咯、咯」、坐得耐起身行幾步屈伸膝頭哥又響....
究竟呢啲好爽嘅「咯、咯」聲，喺咩嚟呢？會唔會有問題嫁？「啪」得多會唔會死嫁？我喺咪有病呀？
今日就等Kit sir同大家分析下啦，Let's Go !
無論邊一種聲音，只要喺關節出現嘅，我哋可以分為生理性（Physiological） 同 病理性（Pathological）
平時我哋「啪」手指、「啪」腳趾、扭頸椎、扭腰、脊醫或者醫師嘅正骨或復位治療，關節都會發出清脆嘅響聲，並且仲會感覺大爽，呢一種叫生理性彈響。
生理性彈響必須滿足以下4個條件 ：
1.只會發生喺關節受到突然前引或曲折嘅時候
2.唔可以短時間內再「啪」，一般「啪」完15分鐘內唔會再有聲
3.聲音喺清脆而且得一下
4.「啪」完唔會覺得痛或者唔舒服，仲會突然提高咗關節活動範圍，有種輕鬆咗嘅感覺
以下係以前對生理性彈響嘅主要理解：
1 . 關節腔氣體爆裂產生聲響
（我一直以來嘅理解）
關節同關節之間嘅縫隙，我哋稱為關節腔 (Articular Cavity)，喺關節腔裡面存在關節液，有保護、潤滑關節面嘅作用。 關節腔內部喺負壓嘅，當關節受到外力前引或者屈折，力量超過關節腔裡面嘅負壓，導致關節之間空間加大，氣體溶解喺關節液入面產生微小嘅氣泡，而呢啲微小嘅氣泡逐步合併成大氣泡，當更多關節液流向關節腔填補被加大嘅關節空間嘅時候，就會產生破裂響聲「咯」
當關節受到擠壓發出響聲之後，15分鐘內無辦法再「啪」 ，呢個時候關節嘅間隔會慢慢恢復正常，更多氣體會再次溶解到體液入面，為下次「啪」做準備
2. 姿勢不良， 肌腱、韌帶、筋膜嘅軟組織在骨頭凸起部分劃過
喺活動或運動過程之中，由於肌腱、韌帶或者筋膜太緊、關節腔隙比較窄、彈性&伸展性唔夠、位置發生改變等等嘅原因 。 會令軟組織劃過骨頭凸起部分，出現響聲。
3. 關節液分泌不足
關節液喺關節入面能夠起到潤滑作用， 但喺當關節液唔夠果時，骨頭同骨頭之間就會摩擦， 呢種摩擦喺短時間內冇咩大問題，但喺時間一長關節軟骨就會有磨損，膝關節比較容易出現呢個問題做成髕骨軟化。
最接近真相嘅答案出現
*骨骼之間有小空間（氣體？液體？）產生
2015年一個非常有力嘅研究，利用MRI技術觀察成個「啪」手指嘅牽引過程，以每秒 3.2 幀速度錄影過程，經過實時電影磁共振成像顯示喺關節分離同聲音產生同時出現咗一個快速空間。實驗結果提供咗直接嘅證據，證明「啪」手指嘅聲響同小空間形成有關，而唔係之前講嘅氣泡破裂所產生。
有關關節出現「咯、咯」聲嘅真正成因及原因
世界學者仍然討論緊，但最接近真相嘅研究，就喺在2015年，一個利用MRI技術嘅實驗，證明關節有聲唔喺因為氣泡釋放，而喺骨骼之間有小空間產生（有圖有真相）
醫學家稱之為「三糖核化」- 傑sir強行翻譯（正名：Tribonucleation）
當然，仍然需要其他研究去搵出確實原因。
以生理性彈響總結嚟講：
第一種（關節腔氣體爆裂產生聲響）無害，「啪」幾多次手指都冇問題
但第二種（姿勢不良， 肌腱、韌帶、筋膜嘅軟組織在骨頭凸起部分劃過）和第三種（關節液分泌不足）時間耐咗就會造成多多少少嘅問題，所以如果你覺得響聲比較大，開始出現不適感或者疼痛，就需要及時尋找專業幫助啦💪🏻。
講完生理性彈響，之後就講吓病理性啦
樓上講完生理性彈響嘅4個滿足條件
而病理性就喺唔滿足條件，一律屬於病理性彈響。
例如：可以不停響，唔需要休息，又或者響嘅時候會出現不適或者痛，咁您就要注意啦，呢種就是屬於病理性彈響
講到好驚咁，但病理性彈響其實好常見
尤其是肩關節、膝關節、髖關節嘅病理性彈響特別常見。
幾十年以嚟，雖然有唔同嘅學者都對於關節嘅「啪」聲來源都提出唔同既假設，但喺冇一個得到完美證實，暫時最接近答案嘅，就喺MRI果個實驗，所以聲響嘅潛在機制仍然喺個迷。
Comments